Verkefnavaka Háskóla Íslands: Um verkefnavöku

Verkefnavaka gegn frestunaráráttu og ritstíflu

Hugmynd að verkefnavöku kemur frá Þýskalandi og hafði Baldur Sigurðsson dósent á menntavísindasviði og þá forstöðumaður Ritvers Menntavísindasviðs frumkvæði að stofna til slíkrar vöku innan Háskóla Íslands. Í Fréttablaði Kennslumiðstöðvar frá 2. desember 2013 er hægt að lesa viðtal við Baldur um verkefnavöku á Íslandi. 

Á verkefnavöku HÍ geta allir nemendur sem eru með verkefni í smíðum, smá eða stór, námskeiðsverkefni eða lokaverkefni, komið og sótt fræðslu, upplýsingar, stuðning og aðstoð. 

Markmið verkefnavökunnar eru:

• að gefa nemendum færi á að vinna að verkefnum sínum utan hefðbundins vinnutíma eina kvöldstund og fá aðstoð og hvatningu
• að vekja athygli á þeim mikla vanda í háskólum heimsins að fjöldi stúdenta kvíðir því að skrifa og margir hverfa frá námi þegar lokaverkefnið eitt er eftir
• að vekja athygli á að unnt er að aðstoða höfunda á öllum stigum ritunarferlisins og hjálpa þeim að komast af stað sem frestað hafa verkefnum of lengi. 

Fyrsta verkefnavaka Háskóla Íslands var haldin árið 2013 og hefur verið árlegur viðburður síðan, fyrir utan árið 2020 og 2021 þar sem fella þurfti hana niður vegna samkomutakmarkana sem þá voru í gildi á Íslandi vegna Covid-19 faraldursins.

Á vormisseri 2024 var ákveðið að breyta aðeins heiti vökunnar en frá því hún var fyrst haldin árið 2013 hefur heitið verið Verkefnavaka gegn frestunarpest og ritkvíða. Þetta er gert til að reyna að ná frekar til nemenda með orðanotkun sem þau þekkja og er notuð í samfélaginu í dag.

Nýja heitið er Verkefnavaka gegn frestunaráráttu og ritstíflu.

Að Verkefnavöku Háskóla Íslands, sem haldin er á hverju vormisseri, standa Ritver Háskóla Íslands, Nemendaráðgjöf Háskóla Íslands, bókasafn Menntavísindasviðs, Heilbrigðisvísindabókasafn Landspítala og Háskóla Íslands og Landsbókasafn Íslands – Háskólabókasafn.