Nokkrar leiðir eru til að tengjast háskólanetinu á háskólasvæðinu og utan þess. Hægt er að leita aðstoðar hjá Menntasmiðju á annarri hæð í Hamri og Tölvuþjónustu UTS á Háskólatorgi.
Landsaðgangur og Háskóli Íslands veita aðgang að miklum fjölda tímarita í gegnum áskriftir. Þau tímarit sem eru í landsaðgangi eru opin öllum landsmönnum en tímarit í áskriftum háskólans eru einungis opin á háskólanetinu. Til að nálgast greinar úr tímaritum í áskrift háskólans er nauðsynlegt að vera með tengingu við háskólanetið, ýmist í gegnum staðarnetið eða með VPN tengingu við háskólann.
Vegna mismunandi samninga við útgefendur er mögulegt að hlutar þeirra tímarita sem eru í áskrift séu lokaðir. Má þar nefna að elstu tölublöðin eru oft lokuð en auk þess er oft birtingartöf eitt til þrjú ár á nýjustu greinum ritanna.
Skrá yfir rafræn tímarit í áskriftum Háskóla Íslands og Landsaðgangs er undir Finna tímarit á vef bókasafnsins. Þar er einnig að finna úrval tímarita í opnum aðgangi. Í tímaritaskránni er hægt að leita að einstökum titlum og einstökum greinum undir hnappinum Ná í gögn. Þar má einnig skoða efnisflokka og útgáfurit einstakra útgefenda. Athugið að stundum er sama tímaritið aðgengilegt í fleiri en einu gagnasafni. Þá er gott að skoða hvaða útgáfuár hjá viðkomandi eru aðgengileg áður en valið er af listanum.
Tímarit og tímaritsgreinar eru skráðar á leitir.is og þar er einnig tengill í tímaritaskrá Landsaðgangs Tímarit A-Ö.
Í tímaritaskrá safnsins Finna tímarit birtist eftirfarandi leitargluggi. Þar má slá inn titil eða ISSN-númer tímarits til að kanna hvort aðgangur sé að ritinu. Þar er einnig hægt að skoða tímaritalista eftir efni og undirflokkum. Í flokkinum Arts and Humanities er meðal annarra undirflokkurinn Education & Careers en þar má skoða upplýsingar um þau tímarit sem eru aðgengileg á sviði menntavísinda.
